Við vitum öll að Extra virgin Olive Oil eða EVOO er eitt af undrum veraldar. Hún inniheldur andoxunarefni og er heil árshátíð af hollum fitusýrum og auðvitað smakkast hún frábærlega með öllum mat. Flest eigum við hana í eldhúsinu og nú sérstaklega í seinni tíð notum við hana við fjölbreytta matreiðslu en það eru samt nokkur atriði sem þú þarft að vita til þess að olían haldist í lagi og þú njótir allra þeirra gæða sem hún getur gefið þér. Hérna eru nokkur atriði sem ber að hafa í huga þegar þú notar EVOO og mistök sem þú ert mögulega að gera en auðvelt er að bæta úr.
Mistök nr #1 – Kaupir hana í plastflösku eða glæru gleri.
Tveir helstu óvinir EVOO eru súrefni og sólarljós svo ef hún er í glærri flösku er hún í vandræðum og er mjög fljót að skemmast. Til að EVOO geymist sem best skaltu ávallt og alltaf kaupa hana í glerflösku sem er dökkgræn eða dökkbrún. Þannig líður henni best.
Mistök nr #2 – Geymir hana nærri hita
Hvort sem hitinn er að koma frá eldavélinni sem er rétt við flöskuna eða beint í gegnum eldhúsgluggan í formi sólarljóss þá er það slæmt mál. Hitinn hefur áhrif á andoxunarefni í olíunni og getur haft áhrif á bragðið af henni. Geymdu hana fjarri hita og ekki í glugganum.
Mistök nr #3 – Dæmir olíuna eftir litnum
Liturinn á EVOO ákvarðast fyrst og fremst hvenær hún var gerð og hvenær hún var pressuð. Gæðaolía getur bæði haft fallegan grænan lit yfir í að vera í mjúkum gulgrænum lit svo ekki láta litinn stoppa þig. Smakkaðu frekar olíuna og dæmdu svo.
Mistök nr #4 – Notar eina EVOO í alla matreiðslu
Þegar úrvalið eru tvær heilar hillur af EVOO stendur valið á milli þessarar mest auglýstu og ódýru upp í þessa sem kostar það sama og að fylla bílinn. Flestir kaupa sennilega eitthvað þarna á milli og nota hana í allt. Staðreyndin er að sumar ódýrari olíur henta bara ágætlega í suma rétti þar sem bragðið af olíunni þarf ekki að standa sérstaklega upp úr eins og steikingu o.þ.h en þegar við erum að tala um að nota þær út á ferskt salat eða sem dressingu á vel eldaðan fisk í stað sósu skaltu velja aðeins dýrari tegund því bragðið er bara allt annað.
Mistök nr #5 – Eldar hana á of háum hita
Algeng mistök eru að hita olíuna það mikið í matreiðslu eins og steikingu að það byrji að rjúka úr henni. Það er ávísun á eyðileggingu andoxunarefna sem eru viðkvæm fyrir hitanum og því mikilvægt að nota frekar aðrar olíur ef á að steikja í miklum hita. EVOO hentar mikið betur til að marinera í eða sem dressing eða sósa þar sem bragðið getur notið sína og lítil eða engin eldun á sér stað.
Mistök nr #6 – Geymir hana of lengi
Ef þú notar EVOO sjaldan getur hún eyðilagst. Hillulíf góðrar EVOO er 24 mánuðir miðað við rétta geymsluaðferðir svo ef þú átt rykfallna flösku sem stendur í gluggasyllunni og er að tana sig í sólbaði skaltu losa þig við hana og byrja upp á nýtt.